為咗音樂，可以去到幾盡？29歲嘅司徒健（圖），自小學習二胡，中三已認定音樂係終身事業，為咗音樂，曾撕毀中五會考證書、離家出走、中五會考後不理家人反對放棄中六學位，堅決兩次投考演藝學院，只為達成夢想，「我會考12分，但到演藝學院讀書，GPA攞3.7至3.8，當你搵到屬於自己嘅世界，之前嘅已經唔重要，之前只係唔適合你，唔代表你唔好」。
家住公屋嘅佢，中學時期喪父，母親無業，哥哥成為唯一家庭支柱，家人一直反對佢讀音樂，但堅持令他於2011年時成為香港中樂團最年輕的全職樂師，「10年磨一劍，對上一個香港人係2001年考到」，去年更裸辭繼續進修音樂，只為成立由香港人組成嘅樂團，更獲政府今年嘅卓越獎學金，準備赴美到伊薩卡學院（Ithaca College）修讀指揮學音樂碩士。