「李彩華小背心」呢六個字，相信咁多位網民都見過唔少，而入到去睇到嘅，絕對唔係33歲，啱啱出咗寫真嘅李彩華(Rain)，而係香港海鮮聯合總會主席，李彩華先生。其實除咗Rain之外，都有啲藝人，一講到佢哋個名，就一定會聯想到其他意思。
馬國明都可以話係最厲害嗰個，最出名就一定係佢喺2013年，大台搞咗個「萬千星輝前哨戰」，揀出「藝員眼中的視帝」，當時就係黎耀祥同馬國明兩個爭，最後馬國明知自己攞獎嘅時候，嗰個O嘴樣同網上改圖「唔_係掛」嘅樹熊一樣，自此之後，馬國明同「唔_係掛」就勾上咗關係。
同樣係大台嘅小生，鄭嘉穎都喺網絡上好出名，喺2011年大台劇《怒火街頭》其中一幕，鄭嘉穎嘅表情哭笑難分，之後被網民加咗一句對白入去「好_好笑呀_你老_！」不過呢句嘢嘅Cap圖，除咗鄭嘉穎之外，劉丹同袁嘉敏都有份。
除咗男藝人，女藝人一樣有經典cap圖，胡定欣喺15年上咗節目《今晚睇李》，講到單立文（豹哥）個老婆胡蓓蔚話想着性感內衣，不過豹嫂就話唔需要買，因為佢老公會講「你冇_嘢呀！」雖然個粗口就只係做口型冇聲，但因為胡定欣呢個表情實在太完美，所以網民每次講到「你冇_嘢呀！」，都會出定欣呢張cap圖。