高鐵一地兩檢方案惹嚟爭議，身兼行會成員嘅湯家驊早前更被翻舊賬，指佢7年前做立法會議員時曾經話過，喺香港市中心進行「一地兩檢」，喺憲法上完全冇可能，但今時今日未有反對。
強調自己冇變過
湯狀噚日喺港台節目解畫，指當年佢係話喺《基本法》下進行一地兩檢係不可能，但𠵱家係以租賃方式進行，「既然係《基本法》之外，就不存在違反《基本法》，或者違憲」，強調係忠於對法律原則嘅堅持，唔可以話一地兩檢方案違反《基本法》。
佢亦指當年反對高鐵嘅理由，例如諮詢不足、菜園村安置問題等，𠵱家已經成為過去，強調自己冇變過：「我覺得我自己冇變，我仍然覺得高鐵係唔需要起」，但𠵱家唔係話贊成起高鐵，「而係贊成起完高鐵之後，點樣盡量唔好浪費高鐵，（兩者）係有分別」，強調𠵱家着眼點係點樣令花費喺高鐵上嘅公帑用得其所，又指行會成員身份，冇影響佢嘅判斷。