政府早前公佈嘅首批副局長同政治助理中，擔任創新及科技局局長政助嘅張曼莉年僅28歲，係現屆班子最年輕嘅政助。點解創科局局長楊偉雄會同張曼莉結緣？局長自己解謎，原來因為對方做過司儀有口才！
楊偉雄噚日同傳媒茶敍時主動提及任命張曼莉，透露約於一年前喺一個科技場合初見對方，當時對方為活動擔任司儀，大讚對方「說話有道理、反應非常好，係人才」。楊偉雄強調搵人做政助時冇諗過年齡問題，仲話自己睇唔出女性嘅年紀。
佢仲大讚本身喺新世界集團任職、曾參選過區議會嘅張曼莉係跨界別專業，可以喺商界同社區進行游說同收料。創科局負責河套區項目，張曾幫地產商打工，會唔會有利益衝突？楊偉雄叫大家唔好將事件複雜化，指張喺新世界只負責科技嘅內部改革。