嘈嘈切切錯雜彈，大珠小珠落玉盤。屯門醫院嘅活動室傳來陣陣琵琶聲，68歲嘅琵琶高手劉柏照喺小型音樂會，向逾50位家人、朋友同院友，分享對音樂嘅熱愛。
劉柏照師承琵琶大師林風，曾經喺公開比賽兩度奪冠，後來為咗事業放棄音樂。年幾前確診前列腺癌四期，當時情緒低落，屯門醫院資深護師黃莉明接受政府新聞網訪問，憶述當初接觸劉柏照，對方受病情困擾，心緒不寧，後嚟知道佢熱愛琵琶，決定為佢搞琵琶演奏會，結果促成屯門醫院首次為病人籌辦嘅音樂會；由安排場地到印製場刊，都係臨床腫瘤科紓緩及寧養服務團隊義務幫忙。
屯門醫院臨床腫瘤科副顧問醫生吳雲英話，癌症患者接受紓緩治療時培養個人嗜好，有好大裨益；圓咗演奏夢嘅劉柏照就話呢次演奏會，令佢覺得「人間有情，世界有愛」。