「紅底」教育局副局長蔡若蓮噚日出席第十屆模擬立法會閉幕典禮，參與嘅年輕人模擬自己係議員、政黨代表，就不同法例草案作出討論，獲現場嘅正貨立法會議員、政黨代表激讚。
「唔好諗洗學生腦」
讚賞學生有紋有路嘅公民黨主席梁家傑，仲當住嘉賓之一嘅蔡若蓮話，香港家長着緊教育，「你睇吓呢啲學生，你洗唔到佢哋腦㗎，所以唔好諗喇，直情唔好諗（向學生洗腦），希望你（蔡）日後多啲來模擬立法會」。
袋巾又叫蔡若蓮同港區人大講，呢一代學子可以如此深入淺出講解議會議題，千祈唔好歸咎於甚麼反共老師。袋巾一講完，閉幕禮都未頒獎，原本坐咗好耐嘅蔡若蓮即時走人，唔通袋巾講嘢，唔啱蔡副局聽？蔡若蓮解釋因為有下一場活動要出席，所以走先！
新民黨議員容海恩點評學生時，大讚其中一組學生的表達手法相當好，「有時內容反而冇咁緊要，但你要講得動聽、好聽，人哋先會聽。靚女都係啦，靚女都畀人望多幾眼啦，啱唔啱呀？」全場年輕人拍掌和應。唔知大家平時有冇望多容海恩兩眼呢？