做咗特首後，林鄭月娥不時喺facebook貼相分享行蹤，前日貼咗同歌神許冠傑（阿Sam）同校長譚詠麟嘅合照，皆因佢去捧場睇兩人嘅演唱會，留言「好興奮」，仲喺fb引用分別由阿Sam同譚校長主唱嘅《鐵塔凌雲》及《愛的根源》歌詞，指「呢啲都係同我年紀差不多嘅人好熟悉嘅廣東歌」。
笑到見牙唔見眼
林鄭呢次encore「少女look」items，繼續黑絲斜孭袋。而佢近年狂loop嘅歌，卻係阿Sam同「哥哥」張國榮合唱嘅《沉默是金》，佢仲引用幾句歌詞「是非有公理，慎言莫冒犯別人，遇上冷風雨休太認真，自信滿心裏，休理會諷刺與質問，笑罵由人，灑脫地做人」，未知係咪意有所指？尤其近日唔少政界質疑佢，言談間對財爺陳茂波好唔畀面。
除咗同阿Sam及譚校長，林鄭亦同薛家燕等藝人合照，笑到「見牙唔見眼」，似乎好開心咁噃。但就有網民批評林鄭唔關注工廈劏房燒死3人，竟然去風騷打卡。