香港行貨手機，相信要等到9月才有新機推出！不過當然，部部都係機王級，iPhone 7s、iPhone 7s Plus、 iPhone 8及Note 8等；不過如果係真心機迷，這段時間冇新機玩，的確會有種寂寞之感。唔緊要！趁住呢個空檔，日系機哪邊箱，有一部新機王無聲無息到港，所講的，就是Sharp AQOUS R（SH-03J）。
據先達經營逾10年水貨手機生意的三禾電氣老闆Simon表示：「AQOUS R！是日本手機今年最高規格的一部，起用了Snapdragon 835頂級處理器，4GB RAM 、64GB ROM，再配上一個5.3吋2K高解像IGZO屏幕（2,560 X 1,440），全部都係現在最主流的頂級規格。」
說起它的2K屏幕，一般人可能只會着眼它的色彩鮮艷，其實如果認真細看，可能你先會發現佢使用了120Hz的技術，好處是令畫面更穩定，尤其在一些高速移動畫面！例如你睇網頁時不斷向上、向下翻頁，又或用手機煲劇時，面對一些汽車追逐或打鬥的高速移動畫面，你會感受到畫面表現更加實淨。另外鏡頭方面，相機主鏡頭採用了2,300萬像素的高解像，而且還有光學及電子防震功能，加上鏡頭設計，使用了90度特闊視覺，用來拍攝風景相就最適合；如果你是喜歡玩自拍的人更加要留意，因為機面的自拍鏡頭，都達1,630像素的高解像，拍起上來畫質會更好。
由於呢部AQOUS R定位屬機王級，價錢亦相對地較高，Simon說：「在日本本土，AQOUS R的機價其實一直高踞不下！原本早十多日前已經推出，不過一直未能引入水貨，原因是日本方面都需求很大，直到今日才有少量水貨到港；機身有黑、白及較特別的紫色選擇，而紫色哪款表面還做了類似珍珠色的塗層，在不同的燈光折射下，會見到有點偏紅或偏藍的感覺，機價現售$7,880。」
查詢：三禾電氣（旺角亞皆老街83號先達廣場1樓F33）
記者、攝影：朱崇德