共享單車喺內地已經興咗一排，畀錢、租車都用手機支付，非常方便，原來南豐集團行政總裁梁錦松都係捧場客。
上個禮拜阿松去成都，為旗下創投基金「新風天域」投資嘅專科醫院揭幕，見到路邊放咗幾部摩拜單車（Mobike），一時貪玩，用電話「掃一掃」、解鎖，動作好純熟，之後就坐上單車，係咁意兜咗兩個圈，不過轉彎時有少少窒，阿松落車之後解釋，因為呢部單車Seat位太低，今次又冇調校好就上車，所以唔太啱位。
新風天域由阿松帶埋舊東家黑石（Blackstone）子弟兵一齊成立，股東包括南豐集團、台灣頂新集團等等，阿松今年65歲，但其他創辦人（包括JM男友吳啟楠）都係三十幾歲，但兩代人明顯冇代溝，事關佢哋會放工之後一齊踩單車去食飯喎，Bromance嚟架。但佢話喺香港就一定唔會踩單車，原因為人太多、又唔讓單車。
阿松自從娶咗跳水皇后伏明霞，做埋爸爸之後，成日都提住三個小朋友。正所謂難離難捨總有一些，佢有冇教囝囡踩單車呢？佢反而推介一個新加坡做法，由大人踩住單車、拉住小朋友車踩幾個圈，等小朋友適應咗平衡感就放手，好過老豆推車尾，最緊要嘅係，「教教吓就梗係鬧，咁咪傷害父子感情？咪搞。」