港股連升七個月後突然掉頭大瀉，係調整定牛市玩完，全城心慌慌唔知點斷判，若然睇番今年初一班玄學家嘅雞年大市預測，或者有玄機。原來年初多名玄學家都講過「立秋」、即新曆8月7日後經濟股市都會轉弱，結果立秋後唔夠三日，個市就跌到咁甘，呢個「立秋派」睇法唔知大家又buy唔buy？
人稱沈大師的沈振盈年初接受訪問時話，大市會係新曆5月至7月會衝高造頂，但下半年都不利投資，立秋之後甚至「有少少擔心會股災」，所以最好喺七月前食糊。不過大師當時估嘅股災禍首，係來自歐洲。
至於玄學家麥玲玲雖則估計未到股災咁誇張，但都話立秋至新曆10月，五行中的「金」力量開始減弱，環球局勢動盪，股市會變得波動，大家要「有糊就食，見好就收」，仲話雞年投資係「財旺身弱，富屋窮人」格局，即「表面上好似有錢，但原來住入面嘅人好窮，今年都有炒賣，但大部份人都係賺唔到、甚至蝕錢。」真係信不信由你嘞。