三子之母嘅陳美齡，本月20號牛一，就62歲，真係信不信由你，佢嘅髮型打扮，跟初出道時變化不大，完全係「凍齡」嘅代表人物。
陳美齡話年齡唔係秘密：「年齡只係一個數字，希望大家睇到覺得我幾多歲，就幾多歲，當你唔識我，就唔好當我係陳美齡。」距離65歲拎長者卡，享受老人福利，仲有三年，陳美齡直認好期待：「好快可以拎到長者卡，仲可以兩蚊搭車，行書展又可以通行無阻，幾期待呀，真係好多優待，返中國博物館亦唔使排隊，我真係執到。」
講到陳美齡形象出道至今冇乜變，佢話：「梗係有變，我生第三個囝囝時41歲，同齡小朋友嘅媽咪細過我，同佢哋一齊活動，令我有年輕感覺，或者咁有啲影響。我唱歌嘅，無意中又保養吓，好啲囉。」陳美齡話早年約40歲時，因為推出情歌，唱片公司叫佢改變形象剪短頭髮，短髮仲keep咗5、6年。問佢仲剪唔剪短？陳美齡好快say no：「當年個個都同我講短頭髮好睇，原來呃你㗎咋，連三個仔同老公都係，佢哋早啲講，就唔使呃我咁耐。」
陳美齡凍齡貼士又係話做運動，個個都做運動，咁佢又做乜嘢運動呢？佢開心share：「跳空繩，係冇條真繩，只係作狀跳。我初時跳100下，現在可以跳兩分鐘，好多下，跳完好索氣。呢個係帶氧運動，對骨好，連手都有運動，鍛鍊下半身，我建議大家有時間就做吓。」陳美齡自爆有時白天暱埋化妝間做，夜晚返屋企就暱喺廁所做：「出咗汗就沖涼囉。」07年患過乳癌後康復嘅陳美齡仲會配合中醫食療，佢會根據體質揀食物，每日一定食五色同五味，五色分別為綠、紅、黃、白、黑，中醫認為人體心、肝、脾、肺、腎五臟分別對應唔同食物顏色，紅色養心、綠色養肝、黃色養脾，白色養肺，黑色養腎。五味就係酸、苦、甘、辛、鹹，中醫認為唔同味道都有唔同作用。
陳美齡覺得最健康係均衡營養，最好食少啲，做多啲運動。