許冠傑（Sam）與譚詠麟（阿倫）一連十二場紅館騷，前晚首場，二人世紀合體互唱經典歌，當中有李小龍女兒李香凝做嘉賓外，還有黃子華扮新聞報道員拍棟篤笑的短片。子華笑言九龍西神多過人，「神」被濫用：「以歌神為例，神係由冇到有創造出嚟，歌神許冠傑就係創造粵語流行曲，𠵱家啲人因為一首歌而紅，但許冠傑就將廣東歌變紅，廣東歌遇許冠傑就紅咗，呢樣嘢唔係我講，係維基講。」
唱到凌晨罰錢
之後，子華笑阿倫是全香港開最多演唱會的人：「佢出道已經不斷開騷，開演唱會就等如一個人打一世工嘅酬勞，阿倫係發明咗一日令你輪迴兩次，佢一日開兩次騷，開完騷可以輕鬆打波，打完波又去開演唱會。」阿倫在台上與阿Sam的兩子懷欣與懷谷夾band，不斷問二人童年時與阿Sam的軼事，而阿Sam即搞笑說只見到阿倫兒子曉風的後尾枕：「個樣唔畀我睇，但應該係小鮮肉嚟喎。」
阿Sam和阿倫全場又跳又唱，雖然偶有蝦碌甩嘴，但有氣有力，阿倫重提擔心阿Sam當年患高山症，更講到眼濕濕，二人唱到凌晨12時才完場，因超時而要罰逾二萬元，而阿Sam照慣例與歌迷嘴對嘴錫，阿倫與歌迷握手時被整損手，右膊更是負傷上陣。
錫得少會投訴
二人完騷後受訪，阿倫笑言二人的歌唱七日也唱不完，阿Sam笑言想見曉風：「聽聞好靚仔。」在旁的阿倫即說：「幻覺嚟。」問到阿Sam是否因流感關係，與歌迷減少錫錫？他說：「唔驚流感，我有貓王抗體，對住啲歌迷，後生又錫，老又錫，肥又錫，瘦又錫，如果錫少咗歌迷會投訴。」
採訪：王連連
攝影：陳慧安
