一個立法會功能組別議員落區開議辦，點只同市民connect咁簡單？民建聯傳統區議會功能組別議員劉國勳，噚日同新界西立法會議員梁志祥同屯門區議員葉文斌喺屯門開聯合議員辦事處，呢個係劉國勳喺新東北區外嘅首個立會議辦。
坊間一直流傳，梁志祥下屆唔爭冧莊，要搵人接班，祥哥現為新界社團聯會會長，劉國勳則係副理事長，兩人一直好啱key；而劉國勳呢屆半爆冷勝出黨內初選、始獲披甲兼當選立會議員，下屆個黨會唔會再搞初選？冇人寫包單，部署轉戰直選亦似乎係時候。
八方問過劉國勳係咪考慮轉戰直選？佢話喎，希望喺全港五大區設立聯絡點，加強同各界聯繫，但不忘補充，對於新界西，尤其屯門同元朗，特別有感情。咦，之咪就係梁志祥嘅盤踞地？