民主黨成員林子健報稱日前喺旺角街頭，被疑似內地強力部門人員擄走兼禁錮，甚至喺大髀打釘，事件詳情仍有待警方調查，但建制派就群起抽水否定事件屬實，包括曾經被質疑喺野雞大學「買學位」嘅民建聯立法會議員葛珮帆，佢喺facebook出po形容事件係「天下奇案」，結果抽水不成反被網民笑佢嘅「博士」學歷都係「離奇趣怪」。
加#真係忍唔住笑
葛博士以「仲離奇趣怪過拍戲喎」形容事件，同時落hashtag「識睇一定睇留言！」、「1271則留言真精彩（采）」、「真係忍唔住笑」，當然唔少葛粉同佢口徑一致，但亦有唔少反對佢睇法嘅人，留言亦好「精采」，主要都係針對佢嘅「博士」學位，多人寸她「你個博士學位就離奇趣怪」、「我吾（唔）信你的學歷多d」、「信佢嘅人一定多過信你個PhD博士嘅人」，另有人直斥：「你係人唔係丫，點做議員為民請命。尊（專）講傷害說話！」
葛博士曾被質疑喺野雞大學「買學位」，佢曾回應「用9年時間好辛苦讀番嚟，係捱番嚟嘅」；獨立股評人David Webb曾追蹤佢報稱獲博士學位嘅「Greenwich University，Hawaii」，發現該校不但同英國名校Greenwich University無關，「校址」更只係校長住址，未獲當地教育部門認可，最後更倒閉。而立法會網頁至今未有載列葛博士嘅學歷。
李八方