許冠傑（Sam）與譚詠麟（阿倫）兩位殿堂級歌手首度合作由藝能製作主辦的「阿Sam＆阿Tam Happy Together演唱會」，昨晚在紅館開鑼，捧場客有鄺美雲、李克勤夫婦外，還有特首林鄭月娥。
明克勤心情
演唱會於晚上8時半開騷，全場爆滿，開場時先播出許冠文的錄影片段：「我好興奮，一生人冇聽過佢兩個唱歌畀我聽。」阿倫與阿Sam戴黑超穿長褸出場，阿倫彈鋼琴及阿Sam彈結他，合唱John Lennon經典名曲《Imagine》揭開序幕，接住二人再唱《The Long and Winding Road》，之後脫去長褸唱《最佳拍檔》、《笑看人生》等名曲，唱到《最緊要好玩》時，更行近觀眾席握手。
阿Sam說：「觀眾好興奮，我就有個口號希望同大家講。」阿倫聞言即說：「吓！今晚有長官喺度喎。」阿倫指明白當年與李克勤開騷時對方的心情，因可以跟偶像唱歌。
自嘲午餐肉
阿倫又指自己25歲，阿Sam則28歲，二人有4個共通點，他說：「啲人話如果我哋唱晒啲廣東歌可以唱七晚。第二係fans夠熱情、第三大家打band出身、第四係大家都係屋邨長大。我哋係美男子，雖然出面競爭好大，好多小鮮肉，但小鮮肉唔襟擺，但我哋係午餐肉，幾時開幾時食，有防腐劑。」
之後阿倫指Sam有位fans到場，阿Sam即謂：「係呀，林鄭月娥。所以專登唱首《沉默是金》畀佢聽，佢係我師妹，以前都鍾意唱歌畀師妹聽，驚佢唔聽晒就走，所以𠵱家唱咗畀佢聽先。」
採訪：王連連
攝影：陳慧安、陳俊強