程東喺電影圈多年，由搞笑角色到惡死乞人憎嘅奸角，每每都有令人驚喜嘅演出，而當中最深入民心自然係《整蠱專家》入面嘅「整蠱之霸」，不過其實佢都有唔少經典角色令觀眾念念不忘。
1.《賭俠》、《賭俠II上海灘賭聖》、《逃學威龍Ⅲ之龍過雞年》
喺《賭俠》中飾演識得特異功能嘅反派單眼佬大軍，同周星馳一樣用異能捽牌，技術仲不相伯仲，而當中最難忘嘅都算係大軍被星仔催眠後，喺扮東方不敗跳舞嘅一幕。其後大軍更加喺《賭俠II》出現，今次仲改邪歸正幫翻星仔。而最後喺《逃學威龍Ⅲ》同洪爺一齊以搞笑形象再現。
2.《整蠱專家》
繼大軍之後今次再次做星仔嘅死對頭整蠱之霸，最後鬥法出動一系列整蠱武器包括「忌廉血滴子」、「誠實豆沙飽」、「謊言豆沙飽」、「慚愧波板糖」、「遙控電流蕉」、「肌肉硬化針」、「紅粉迫擊炮」，至今都仍然被網民拎嚟翻兜。
3.《九品芝麻官》
戚家管家來福因為戚家滅門慘案受審，收咗錢之後佢承認同少奶張敏通奸謀害戚家，目不識丁嘅來福話少奶愛幕自己嘅文采而通奸作案，結果被周星馳一張《靜夜思》識穿之後，當場除褲證明自己係太監，呢一幕真係百看不厭。
4.《古惑仔情義篇之洪興十三妹》
入行多年嘅程東演得最多嘅就係黑社會大佬，當中最印象深刻或者乞人憎嘅應該係《古惑仔》入面嘅鹹濕，搶吳孟達中獎六合彩已經衰格，之後更睇中吳君如姊妹楊恭如。原來程東本來將角色設定為每講一句說話就會向對方吐口水，最後因為太衰格所以冇做到。
5.《獄中龍》
雖然同樣係演黑社會大佬，但今次難得演好人蝦毛，喺監獄內照顧劉德華同何家勁，，三人最後更結成好友，當中一句經典對白「好心有好報，幫下人又唔會大肚」最終未能實現，蝦毛最後遭仇家用車撞死，講開又講，劉德華同黎姿喺戲入面有幕海邊戲水，玩到濕身嘅黎姿有一小瞬間走光，成為經典。
6.《明月照尖東》
黑社會大佬形象入形入格嘅程東今次就飾演鍾情於虐待公關小姐嘅森哥，戲中同關之琳交惡，不過關之琳背後就有殺手張學友同差佬黎明撐腰，最後森哥被打到豬頭一樣。
7.《我和殭屍有個約會》
除咗電影，程東都有參加電視演出，喺《我和殭屍有個約會》中佢就飾演一名孝順裁縫師羅開平，因為喺三破日自殺，吸入無數孤魂野鬼而成為厲鬼—餓修羅。同主角大戰幾場之後最終受到感化，怨氣盡消後落地府學習道術。