人稱「綠葉王」嘅李國麟，第一份工就係加入無綫，做足四十幾年，演過過百齣電視劇，由主角做到配角，但李國麟就覺得老一輩嘅演員都係飲水思源，昨日有周刊報道指，李國麟早前就為咗拍攝《溏心風暴3》，推掉大陸嘅商演同劇集，損失百幾萬。
62歲嘅李國麟，最近同大台續約兩年，講到喺大台捱足半世，只換來「綠葉王」嘅稱號，李國麟一啲都唔介意，如果冇無綫，佢就唔會有外面嘅市場，所以咩主角、綠葉對李國麟嚟講，一啲都唔重要，喺佢心目中根本冇主角、配角之分，佢係一名演員，專業人士，依家只係做好呢份工，enjoy做戲，唔使捱就得。
入行多年，李國麟連負面新聞都唔多，睇落都好順風順水，但原來佢都試過人生低潮。02年金融風暴，李國麟因為炒股票而輸掉千萬身家，報道講到佢炒股票，衰貪心，見好唔識收，就係咁輸掉千萬身家。輸咗千萬身家都唔止，李國麟仲欠銀行幾百萬，當時有人叫佢申請破產，但係李國麟覺得唔係咁好，最後佢選擇咗債務重組。
報道指，為咗還債，李國麟要變賣物業，佢話以前層樓500幾萬都唔賣，但係嗰陣時180萬都冇人要，變咗銀主盤，仲要阿女得6個月大搵屋搬。幸好，搬屋後就開始順利，其間好友嚴秋華去佢屋企探訪，嚴秋華鬧醒咗佢，話佢拍電視同電影賺到好多錢咩？又唔登台又唔唱歌，最後李國麟就開始學唱歌，跟住就開始去市政局獻唱，一千蚊一場，之後佢就憑四首歌《十一哥》、《舊歡如夢》、《沉默是金》同《問我》走天涯，李國麟笑言就係咁樣「呃咗」好多錢，還清幾百萬債務。
講到股票，李國麟話知道自己貪心之過，o依家唔敢再掂，一毫子都唔會再買，佢話呢啲錢真係唔係佢賺㗎喎！