上個馬季練馬師鄭俊偉戰至最後一個賽日，才勝出「仁仁友福」夠16Win成績達標，險過剃頭。所以又難怪唞暑後鄭俊偉今季異常積極，幾乎日日晨課都見佢落力督操，明顯希望搶攻盡快爭取佳績，避免重蹈上季差啲收警告信之覆轍。
呢日鄭俊偉亦一早伏喺機坪欄邊睇馬，其中佢明顯最着緊「駿協精英」，隻馬操前操後，都見鄭俊偉傍實左右，並向鞍上助手問長問短，非常認真，看得出此駒在廐主心目中地位唔低。
五歲馬「駿協精英」在港九戰未勝，但曾於三班1400米大冷門289倍跑第三，可見有一定實力，如今落至四班55分，已比抵港時低18分之多，完全具備反彈條件，難怪今季一開波即力操，已快跳兩課及踱步多課，看來鄭俊偉勢必部署「駿協精英」復出即拼。