一連三日香港高級視聽展噚日喺灣仔會展開鑼，全球最矜貴嘅法國耳筒Focal Utopia by Tournaire，亞洲首度曝光，天價98萬，你buy唔buy？耳筒代表Jake話，全球限量8副已賣咗兩副，其中一個係台灣女發燒友㖭。賣點除咗靚聲，仲鑲咗6卡鑽石㖭。
333萬喇叭聽聲如見band
全場最貴產品係美國YG Acoustics Sonja XV揚聲器，售價333萬元；駿韻音響Director Paul解釋話，套揚聲器有四柱合共20個單元，聽歌會感覺成隊band喺你前面演奏。八方現場試聽，真係聽聲如見band。
講到全場至貴嘅CD，數到終極靚聲玻璃CD《鬼太鼓座》，賣7,200元；風行唱片總經理林錫堅話，已經打咗7折，原價一萬蚊，已賣咗100隻。
吓，原來啲發燒友好似買菜咁。八方都係揀啲平民版發燒CD，好似葉振棠《你是我的眼》、露雲娜《酒紅色的心》、陸寶《愛聽陸寶》等，全部100蚊就有交易。
大會音響技術總經理錢有基話，市道疲弱冇影響高階音響市場，料高級視聽展入場人數較去年升一成，至3萬人次。