近年足球的暑假轉會期，多單重磅交易都以億計算。上年原於意大利搵食的球星普巴，就以逾9億港元轉會曼聯。
今年曼聯再用7.6億港元簽入比利時籍的盧卡古，然後巴黎聖日耳門還癲得至堅，以破全球單一轉會費紀錄的20億港元，買入巴西球星尼馬。基本上，現時想喺足球轉會市場買入心頭好，真係閒閒哋都起碼要以億計港紙起錶。
雖然足球轉會嘅銀碼真係誇張得過份，但係環球賽馬拍賣會所用嘅金額，都不遑多讓，尤其亞洲。如上月喺日本北海道舉行嘅精選拍賣會，唔少馬仔都係以億億聲咁賣出去，不過就以日圓計算。
由日本種王「大震撼」與09年法國一千堅尼盟主Elusive Wave所誕下嘅雄馬BB，就俾馬主近藤利一以5億8千萬日圓（約4,000萬港元）投得，更成為今次拍賣會最高成交馬匹；而第二貴為一匹馬女，都圍梗喺3億7千萬日圓（約2,500萬港元）。
望返嚟香港呢邊，馬會喺香港國際拍賣會入面，亦都賣咗隻身價1,050萬嘅「家品皇者」俾日本城老闆劉栢輝，呢個價位亦係香港拍賣價嘅一個紀錄。
有馬迷可能會問，用成幾千萬買一隻馬返嚟，究竟回本能否有望呢？其實呢啲黃金貴價馬，贏到四至五場一級大賽，咪有機會回本。