民主派內一直有聲音話香港要「源頭減人」，就要攞番單程證審批權。建制派聽到梗係反對喇，不過似乎佢哋都唔反對「源頭減人」。民建聯噚日公佈大灣區發展嘅建議，當中一項係要求內地畀香港人申請內地身份證。果真成事的話，咁就真係源頭減人，從減少香港人入手咯。
民建聯主席李慧琼噚日連同黨友周浩鼎、政策委員會主席呂堅出嚟宣佈建議，提到為咗鼓勵港人返內地發展，應該畀港澳學童獲得廣東省嘅義務教育、國民嘅醫療待遇、同埋香港跨境私家車無限額進入廣東等，但最閃亮嘅建議非叫港人申領內地身份證莫屬。
李慧琼話，家陣內地科技發展好快，例如電子支付、共享單車等，拎回鄉證嘅香港人想用呢啲服務唔多方便，所以提議畀港人申領內地身份證，咁就可以享有同內地人一樣嘅待遇。咁點先申領到呢？李慧琼就話呢個建議只係概念箒，旨在方便港人喺內地生活，具體細節要由番兩地政府去傾喇。