由香港賽馬會慈善信託基金贊助「香港賽馬會呈獻系列：永生傳說──透視古埃及文明」展覽，自6月開始喺香港科學館展出，短短兩個月左右，平均每日有逾8,000人次入場，已經吸引咗超過50萬人參觀，仲打破埋香港科學館專題展覽每日平均入場人次嘅紀錄！
噚日馬會同康樂及文化事務署搞咗個儀式，歡迎第50萬名觀眾參觀展覽，馬會慈善及社區事務執行總監張亮、康樂及文化事務署署長李美嫦與馬會吉祥物「同進啦啦隊」成員 「JC隊長」特別去到科學館，歡迎第50萬名觀眾、9歲嘅蔡韻希小朋友。
蔡韻希媽媽話，韻希好開心可以睇木乃伊。佢話今次有咁多具木乃伊來港展覽係好難得嘅機會，但之前因為怕參觀嘅人太多冇去，所以到噚日先帶韻希到場參觀，結果成為第50萬名觀眾。今次展覽展期至10月18日，仲未睇嘅市民仲有時間去睇㗎！