自由黨嘅陳浩濂前排獲委任為財經事務及庫務局副局長，令佢原先做緊嘅中西區區議員議席要進行補選。政府噚日趁住星期五正式刊憲，公佈中西區區議會山頂選區有出缺喇。至於幾時補選？政府就仲未交代。
前排政府正式委任副局、政助前，政圈已經估到陳浩濂會獲委任，當時盛傳嘅名單入面，仲有一位都係來自中西區區議會嘅民建聯蕭嘉怡，有傳佢係做政務司司長嘅政助。不過最後政府公佈時就未見蕭嘉怡個名。
唔知政府係咪要等埋蕭嘉怡嘅任命公佈，然後兩場區議會補選夾埋喺同一日舉行呢？點都好，既然有補選，自然又引嚟民主、建制兩大陣營考慮。據聞民主派都心郁郁，但由邊個黨去派人就未有定案，而建制派方面，自由黨亦有心水人選，最終鹿死誰手真係要拭目以待。