考評局秘書長唐創時就快離職，9月中就會去公開大學做副校長。唐博士噚日同一班行家茶敍兼預先餞別，分享6年嚟嘅趣聞同秘聞，佢爆原來每年公開試，都一定有考生考到嘔，即係喺考試期間唔舒服、嘔咗落份卷度，有時仲嘔埋血！為咗唔好浪費考生嘅心血，考評局會出盡力幫份卷「急救」，真係唔講唔知。
用棉花棒剔走再吹乾
唐博士喺離職前夕親自走訪多位資深考評局職員，知道咗好多秘辛，寫落啱啱推出嘅《登峯》考評局40周年特刊。唐博士話，雖然做到嘔嘅考生為數唔多，但後續處理絕對唔易，首先要將有嘔吐物嘅卷放入密封膠袋，運送返考評局之後，職員要用水輕輕整濕番份卷，再慢慢用棉花棒剔走嘔吐物，吹乾之後先可以拎去掃描、再評卷。
唐博士話，每年公開試涉及幾十萬個科次，總有考生頭暈身㷫，當中亦都一定包括有考生作嘔；八方就聽聞有啲嘔吐物唔止係食物，仲有血㖭。除咗職員要幫份卷「做手術」清走嘔吐物，之後考評局嘅常設委員會亦都會逐一審視個案，睇吓呢批唔舒服、表現可能受影響嘅考生，分數上係咪需要調整。
回望過去6年，唐創時話推動中學文憑試係一大挑戰，佢個人就好希望中文科可以擺脫「死亡之卷」外號。唐博士話，的確聽到唔少校長講，考生太過專注於兩個語文科，尤其是中文科，搞到喺選修科目、其他學習經歷嘅時間同精力減少，所以佢好希望可以探討點樣簡化中文科考核，為學生釋放多啲空間。
李八方