自從特首林鄭月娥上場後，中聯辦主任張曉明（圖）變得好低調，之前傳佢特首選舉後好快上調港澳辦代替王光亞做主任，至今仲未有聲氣。有政界人士同八方講，最近又有風聲傳出，話國家主席習近平訪港後，對訪港安排好滿意，仲對負責統籌嘅王光亞頗為讚賞，所以傳王光亞個港澳辦主任位，可能會再坐多一陣喎！
習訪港後滿意王統籌
其實王光亞已67歲，夠晒退休年齡，早係今年兩會期間已傳佢要退休，由小明上做港澳辦主任，但傳咗咁耐都冇聲氣，𠵱家仲傳習讚賞王光亞、又傳王可以再坐多一陣，有政界人士更聽聞，王光亞有可能坐多一年半載，等中共十九大之後，負責港澳事務新領導上場先走，咁樣嘅話小明要做港澳辦主任，就會有更多變數。
另一政界人士話，日前小明係成立國慶籌委會演辭入面，DQ 4個民主派立會議員講成係反港獨「功勞」，又用大量篇幅狂擦習近平鞋，無非想講自己有貢獻，亦好支持習，想向習、中央表示忠誠，佢又聽聞小明連做過渡性嘅港澳辦主任都肯，就算只做一年半載都冇問題，希望可以風光離開香港，最後能否如願，就要睇習近平決定。