澳洲籍小鮮肉騎師祈普敦，上季獲40場頭馬，其中16場來自大摩馬房，大摩在新季聘請貝湯美做主帥，令人擔心小祈將不再受重用，成績隨時大倒退，不過性格樂觀的小祈直言擔心是多餘的。
祈普敦說：「首先我要多謝大摩支持，他係一位非常嚴謹嘅練馬師，無論對馬房員工抑或騎師，大摩嘅要求都非常高，自己有幸騎過佢旗下多匹良駒，『喜旺寶』同『無敵飛龍』上季為我帶來好多難忘回憶。」
「我騎『喜旺寶』8次得4冠4亞，全部入晒三甲，更喺季尾贏出三級賽獅子山錦標，係自己在港首項分級賽錦標頭馬。而『無敵飛龍』贏出賀年盃，當日我仲中三元，新季大摩俾我嘅支持率會係點，我唔會太刻意去諗。」
「未來我會更加努力爭取其他馬房支持，好似蘇偉賢、姚本輝等幾個華人倉口，上季我同佢哋合作愉快，新季當然渴望得到佢哋繼續支持。大家亦可能留意到告東尼、葉楚航等練馬師，上季也曾提供過座騎給我，但未能攜手入凱旋門，希望新季可有零的突破。」