但凡有選舉，傳聞總會滿天飛，尤其政府DQ四位民主派議員，加埋之前DQ梁、游二人，大大話話成6個議席，政界點會冇八卦嘢聽呢？
江湖傳聞，被DQ嘅姚松炎所屬嘅建築、測量、都市規劃及園境界，唔少人蠢蠢欲動，除咗姚松炎本身或者再戰，仲有已經打咗開口牌、話積極考慮再選嘅前議員謝偉銓，而最新榜上有名嘅係香港建築師學會原會長、身為公民黨創黨黨員嘅吳永順，盛傳界內有人想推舉佢出戰喎！
吳永順喺特首選舉中支持林鄭月娥，唔通佢都想喺女特首治下，入立會喺規劃建築方面大展拳腳？八方問過吳永順，佢話傳佢出選立法會選舉，已經唔係第一次咯，重點係：「歷史已證明唔係事實！」至於呢一轉嘅江湖傳聞，佢強調：「呢個係傳，到呢一刻都冇諗過，從來都冇諗過，我已經好多嘢做。」