噚日港股一度急挫近500點,收市跌幅收窄至大約300點,單日跌幅為最近一個月最大。呢啲都唔算係咩,令我最驚訝嘅係,近日喺網上討論區見到一個帖文,又有少年股神想轉全職炒股。唔通升市要玩完?係咪要大手減持呢?
嗰位網民提到,自己炒股一個星期都賺到成個月人工,已經冇心機日日返工捱世界,似乎想轉行全職炒股。前幾日先有資深投資者話,牛三有排未玩完,除非出現周街股神,賣菜都可以做股神,咁就大鑊啦。歷史總是驚人地相似,記得2015年4月嘅大時代,都係全民皆股,落街買個叉雞飯,都會聽到燒味師傅對股市高談闊論,證券行或者銀行門外總有一班「抬頭族」。而冇幾耐,個市就暴插,呢班忽然股神消聲匿跡。
然而,我近期暫時都只係見到呢一個股神,個市可能都仲有得升。恒指連升超過7月個,上一次有較大嘅單日跌幅係7月4日,跌咗395點,不過之後用咗5日就收復失地,跟住開始一個月嘅強勁升勢。如果恒指下星期可以迅速重上27800點,28000點不遠矣,亦可能意味住下輪升勢要開波。
順帶提提,同上述網民有相同諗法嘅人,唔好做傻事。升市個個都可以係股神,因而轉全職炒股嘅人,十有七輸,兩個喺股海浮沉,只有一個真正搵到錢,搵到大錢嘅人更少之又少。
風吹知