有炒飯哥之稱嘅羅理雅早前因為傷患，搞到要自我停賽差唔多三個月，收入因而大減，而今季喺晨課都明顯見到佢極之餓馬。
除咗成為全港最早開工嘅騎師之外，復課至今，幾乎朝朝都見到呢位騎師操馬。前日（8日）操完七匹馬後，似乎覺得唔夠喉，尋日朝（9日）更一日連操九駒，而呢堆馬主要嚟自三個華倉，包括葉楚航、沈集成及蘇偉賢，認真勤力。
去到今朝（10日），雖然沙田一直落住雨，但炒飯哥一樣當冇到，繼續冒雨開工，睇嚟佢真係餓得好厲害。不過今次摸馬數目就少啲，但都有摸咗五匹馬上手，除咗苗禮德旗下兩匹嘅「鋒芒畢露」及「龍城勇將」外，其餘又係嚟自葉楚航同沈集成，似乎呢兩個華倉來季將大大力支持呢位騎師。