舒淇舊年9月同馮德倫結婚，婚後二人各有各忙，鮮有合體照流出，早排更傳佢哋婚姻亮紅燈。
不過流言話咁快就俾當事人用行動篤破，前日兩公婆喺北京宣傳新片《俠盜聯盟》時，仲喺台上咬耳仔晒恩愛，之後又拍拖睇首影。咁啱前日係馮德倫43歲生日，夜晚舒淇就喺IG貼咗同老公仔嘅合照。相中拎住香檳嘅舒淇嘟起嘴，挨實老公仔膊頭，馮德倫就拎住紮花笑到好鬼冧，舒淇仲貼文祝賀老公：「二馬先生，生日快樂喔！你乖乖的努力工作，最重要是身強體健，才好好保護，讓我可以在家無憂無慮的跟你吵吵鬧鬧，到處的蹦蹦跳跳。糖就不需要派太多，吃太多要蛀牙的啦，嗯哼，不管怎樣，意思意思的祝福你健康平安喜樂唷！」
老婆咁抵錫，馮導演唔使食糖，一樣甜入心啦！