政府早前公佈2017年嘅正式選民登記冊，發現大有機會舉行補選嘅新界東選民人數升最多，較去年多咗近1.4萬名選民，而新增選民主要來自沙田公屋區「乙明」，呢區嘅選民人數較去年多咗近4千人，增幅37%，屬全港之冠（大部份選區增減幅只有1%）。
懷疑建制派種票？聽乙明區嘅區議員丘文俊講，除咗乙明邨，區內仲有一個新屋邨「水泉澳邨」落成入伙，約住逾3萬人，由於政府會自動幫公屋居民嘅選民所屬選區由舊區轉到「乙明」，所以呢區就多咗咁多選民。
新增選民咁多，一定有唔少人對呢區虎視眈眈，聽丘文俊講，有傳將代表建制派參加新界東補選嘅工聯會鄧家彪，幾乎日日落嚟水泉澳邨做家訪，唔使講都知為乜啦！事實上鄧家彪亦常常透過fb水泉澳邨「打卡」，唔知或者真係以為，佢係水泉澳邨嘅區議員喎！丘文俊話，由於水泉澳盛傳會係沙田區下屆區議會選舉中其中一個新選區，原屬離島區議會嘅鄧家彪，由東涌「移民」過來沙田參選，絕不出奇。