風靡唔少少女嘅冰雪奇緣（Frozen）遇上勁敵，香港迪士尼樂園宣佈小熊Duffy嘅最新好友、夢想成為舞蹈家嘅小兔Stella Lou正式加入樂園，樂園話原來Duffy系列近年人氣急升，7年間產品銷量激增10倍，僅次於最受歡迎嘅米奇同美妮，勁過Frozen，成為咗少女新寵兒，今次Elsa有勁敵。
男粉搜羅萬件產品
迪士尼噚日喺園內舉行迎新派對，有超過40名嚟自本港同海外的Stella Lou粉絲參與派對，有男粉絲話屋企更有成萬件產品，認真瘋狂。今日起顧客可以喺樂園近距離同Stella Lou會面同selfie，係全球首個樂園有呢種獨家享受。
香港迪士尼樂園商品營運綜合策劃經理陳偉賢話Duffy系列商品自從2010年引入樂園，到今年銷售額勁升10倍，商品款式由最初20幾款增到今日300幾款，今次小兔Stella Lou嘅加盟，單計上個月中到𠵱家小兔嘅產品已賣出成1.5萬件，年底前更會推出150件Duffy系列嘅新產品。