被稱為「頭號梁粉」嘅前商交所主席張震遠，噚日涉嫌詐騙被捕兼提堂，唔少政界中人為此震驚，因為事件好似冚得好密，事前冇乜洩露風聲，與此同時更多人問嘅一句係：人走「查」梁，梁振英又如何？乜嘢意思？大家心照！
吓，寫到呢度都唔明，點解要問前特首梁振英狀況？噢，咁就由監察689不遺餘力嘅自由黨榮譽主席田北俊，再幫大家畫出腸。田少噚日中午已經喺facebook出帖，分享張震遠落鑊嘅新聞報道之時，留言話：「幾時都話做大佬着數，做細嘅只會俾人攞去祭旗」，然後hashtag「我相信香港有法治」、「UGL無下文？」似乎好期待追看《人走查梁》呢套連續劇。
689繼續吹
嗱，近日先後有「梁粉」接連出事，先有特首選舉時同梁振英競選辦成員出席過小桃園飯局嘅新界「猛人」被捕，噚日再輪到「頭號梁粉」，又難怪為政圈花生友增添唔少美麗嘅遐想嘅，但當事人即係梁振英，心情似乎未受影響噃。
689噚日繼續透過政府電郵系統出稿，吹噓自己任內「貢獻」，包括指去年喺施政報告宣佈撥地興建香港首家中醫院，並鼓勵大學研究中草藥嘅有效成份同制訂標準，前日仲參觀咗喺珠海橫琴嘅粵澳中醫藥科技產業園。身為全國政協副主席嘅佢當然不忘硬銷大灣區，佢話香港、澳門同珠海都係大灣區城市，喺中醫藥研發同中藥生產方面，各有實力，無理由以為攬住阿爺要大搞嘅baby，就係最好嘅護身符啩？
李八方