養大B仔B女要幾錢?Bob生足4個使費逾2千萬

養大B仔B女要幾錢?
Bob生足4個使費逾2千萬

成日話養大個B要400萬,但係o依家乜都貴,400萬真係已經叫準備充足?《蘋果動新聞》特別找來一班爸爸媽媽級藝人試玩一下「育兒點算好」網站,計一計各人預算用多少錢養B。

Bob(林盛斌)養咗三個女兼老婆陀住B仔,剩係計入讀小學嘅大女,雖然唔諗住要子女入國際學校,但都希望安排仔女去外國讀書,結果一個小朋友計埋居然已經要使超過525萬,阿Bob講笑話:「我同太太又唔係要谷到個小朋友好勁嗰啲,但係又估唔到要成五百幾萬一個,我有四個小朋友,即係要成2,000幾萬,咁又唔係好多,都係面嗰浸啫!」

單親媽咪可嵐都有個6歲半嘅囝囝,小朋友啱啱升讀小學,每個月學樂器興趣班已經要使2,000蚊。可嵐經測試後係「裝備充足型」媽咪,預計要用354萬去養大囝囝,不過條數可能都係計少咗,佢話:「其實我仲心大心細,唔知中學俾唔俾個仔返加拿大讀書好,但暫時係想等到大學時先俾佢過去。」

同樣係「裝備充足型」媽咪嘅谷祖琳都話教育基金其實都當係自己儲錢,希望有個好嘅準備,自己都要努力做嘢為兩個女供書教學,谷祖琳都好緊張小朋友嘅課外活動,佢話:「會睇下佢有邊方面嘅天份,邊方面好啲就學多啲。」

有兩個囝囝既周家蔚經測試後,都預算要將花760多萬培育TJ同JT,係「重質重量型」父母。佢計劃俾囝囝到加拿大升學,但擁有加拿大籍嘅佢已慳不少,現時囝囝每月已經上不少課外興趣班,成本認真襟計。講到近800萬嘅育兒費,周家蔚笑言:「我平時都係寧願慳自己,以前真係唔係好識慳,做咗媽咪就要改變下。細個媽媽成日話我睇錢睇得唔重要,自己覺得好又一餐唔好又一餐,無所謂啦。」但佢坦言兒子開始長大,要為佢哋灌輸理財觀念:「我都會教大仔,有時佢扭計、喊要買嘢,我會同佢講Daddy、Mummy搵錢好辛苦,你想要糖定要媽咪陪呀?如果媽咪出去搵錢就可以買糖,好彩佢都會揀媽咪。」

想計下要為自己小朋友準備幾多錢?請參考「育兒計算機」網站:
http://calculator.easypama.com.hk/