咁多位立法會議員中，最多樓喺手嘅肯定唔係民主黨涂謹申，但阿涂就似乎開創咗喺日本買樓嘅先河。睇番阿涂提交嘅利益申報，佢太太阿Sue持有嘅日本物業再有進賬，由原先兩個物業變成三個，睇嚟阿涂一家對日本樓情有獨鍾。
日本係好多港人嘅摯愛，但鍾意到喺日本買埋樓呢，阿涂真係先鋒。佢喺2015年向立法會嘅申報顯示太太喺日本有樓，當時阿涂分享話，事緣見到朋友用30萬港元喺大阪買咗間200幾呎嘅開放式單位，收租都有6厘回報，萌起喺日本置業嘅念頭，於是喺東京新宿西邊買樓做日本業主，喺新宿車站坐3個站、再行兩分鐘就到，都算方便。
舊年新一屆立會開鑼，阿涂嘅申報就顯示太太喺日本有兩個物業，到咗上月初，涂太再下一城，增持多一個，至今手握三層日本樓！