既然小學校長炮製了「影子學生」呃資助，見「影子」咁好使，高鐵一地兩檢，好快會出現：
一，影子乘客。商務客急降無有怕，大媽大叔扮生意人在西九出遊，鬧鬧哄哄，載歌載舞。陳帆局長誇下海口，高鐵九百億建造費不出五年，必然回本兼賺凸！信納嗎？實際啲啦，冇不信納這個選項啊！
二，影子直達車。每日164班車只得12班是直通廣州南站，為了篤48分鐘呢條盲數，影子車號會快閃出現在告示板並以高速消失，唔係無快車，係你搭唔到，陳局長無點你。
三，影子年輕擁躉。放長雙眼睇真陳局長，除下眼鏡確有毛主席髮的風采，陳局長一樣視年輕人為八九點的太陽吧對不對？好快便有粉絲說，被局長感召，上天堂前，決定瞓身撐高鐵一地兩檢。大前提係要局長保證，在高鐵站拎住玻璃樽，不會被控暴動罪。
四，影子like。唔使再呃like，有影子like搞定！梁美芬摑「下不為例」的湯家驊一巴掌，再抽「絕對不會隨隨便便發生」的袁國強水。西九割出去由內地管治，好嘢嚟，無理由只益西九龍，當然陸續有來，每區後發先至。芬姨，好嘢過詩姐！不但影子，連「建軍大孽」的戲子都like爆。