陳奕迅（Eason）於今日出新歌《誰來剪月光》MV，呢首係一隻慢版情歌，所以Eason喺MV都要襯番歌名，拍得好有詩意同浪漫，攝製隊唔單止喺香港拍攝，仲揼本去埋英國倫敦實地取景，Eason喺MV裏面由一個陀螺勾起往事，憑住佢「好臣化」嘅演出，喺夜闌人靜嘅街頭踱步，望住月光諗起舊情人，喺Eason面上難得一見嘅哀傷表情，加埋周圍沉重嘅氣氛，令MV帶出一點無奈。
現實中風趣幽默嘅Eason，坦言同月亮做「對手戲」感覺好浪漫，Eason仲話全張碟最鍾意呢首慢歌：「最有感覺最有詩意，又有中國曲風，係不可多得嘅好作品。」呢首歌由馮穎琪作曲，易家揚填詞，集合中西兩種音樂元素，用月亮表達對愛嘅嚮往同恐懼，Eason好少唱呢類中國風嘅歌，希望帶畀歌迷新鮮感。
阿徐水上飄
此外，臣嫂徐濠縈趁住暑假，日前同囡囡康堤出海玩，阿徐除咗跑步，原來水上運動都好掂！
撰文：馮仁昭
