特首林鄭月娥啱啱先結束訪京行，噚日已經連走三場，先出席八鄉少年警訊永久活動中心暨青少年綜合訓練營開幕禮、後到文化中心主持全運會特區代表團授旗儀式，晚上到港島出席客屬總會就職禮，但冇回應傳媒提問。
林鄭中午出席少年警訊永久活動中心致辭時話，中心嘅開幕對佢意義極大，指當年係以政務司司長身份支持該處由消防訓練場地改建成少年警訊中心，冇預計會以特首身份主持開幕噃！
都係嗰句啦，言者或者無心，聽者就可能覺得係「風涼話」，林鄭嘅「直率」說話方式，相信不時令唔少人感到不是味兒，唔知689聽到又會唔會對此有話兒？
林鄭同時話，國家主席習近平訪港期間參觀過中心，顯示中央政府對年輕人嘅關愛同支持，相信中心落成會對18萬名少年警訊成員同年輕人嘅發展有貢獻。