59歲著名時裝設計師鄧達智（William），兩個月前跟同性醫生陳梓欣（Clement）訂婚，兩人下月再擺喜宴。作為公立醫院醫生，面對壓力更大，Clement早前罕有接受《add》訪問，平實、勇敢暢談同性愛情之外，剖白由大學時看《神父同志》（Priest），令基督徒的他正視自己性取向。他慶幸港人會互相尊重不同性取向，但更慨嘆香港婚姻平權的落伍，「連議員動議去探討，都俾人否決，呢條路真係好漫長。」
撰文：林妙萍
攝影：郭賢興
「有啲病人，好熱心、好窩心，專程走入病房同我講恭喜，多謝佢哋！」任職瑪麗醫院外科醫生的陳梓欣，講笑指公開和鄧達智關係後，面對壓力比想像中輕鬆，更收到醫管局極高層的電郵恭賀，「去到醫院職員餐廳，未騷職員證買餐，收銀員已經話：『認得㗎喇，知㗎喇。』好方便，走埋嚟啲人，都係講恭喜說話。喺香港呢個不同文化嘅大都會，好多人都會互相尊重。」
源於《神父同志》
Clement的同志啟蒙之路，來自Linus Roache主演的電影《神父同志》，「我好遲先知，係大學四年班。我係基督徒，返教會，當時睇到《神父同志》，最初感覺係喺教會度，唔係教我吔要互相相愛咩？咁當一個神父有咁嘅情況，我哋唔係應該更給予愛心同支持？後來發現，喺自己思想中都有對男性有好感呢個成份，就覺得要正視啦。」
信教的Clement其後去了一間同志教會探討，亦一如許多同性戀者，最初並沒有跟父母商量提及，「爸爸嗰時過咗身，媽咪係健在，但呢個問題屋企係唔容易接受，我自己當時都唔容易接受啦。」那時已經就讀醫科的Clement，沒考慮過未來職業，他之後曾到南非做交流生，亦去過偏遠蘇丹等地做無國界醫生。
大家或者都有聽過這類新聞，同性戀病人有意外或需做手術時，伴侶不能代為簽紙，最終可能仍要找十年八載沒見的父母，或關係不好的家人。
訴求婚姻平權
Clement直言一日未有婚姻平權，醫生層面只能按法律做，「你可以立定平安紙，你嘅醫療意願係點，否則喺法律上，醫生都係會搵第一血緣嘅人做決定。」他見盡許多同志伴侶在病床上互相扶持，但最終可做的事很有限，「一個沒法律約束力嘅同志婚姻，法律上醫生係唔可以聽你決定，香港呢方面係落後啲，所以第一，係要立法，我支持爭取婚姻平權。」
Clement慨嘆香港連議員動議討論婚姻平權，亦被否決，之前一單案例，有公職人員成功為海外註冊的同性伴侶爭取家屬待遇，但其後亦被上訴否決，「客觀環境，香港暫時係未有呢個氣候、條件去爭取到，條路仲好漫長。」
真愛在乎心意
鄧達智視Clement為人生真愛，Clement過去亦有幾段伴侶關係，「我覺得我以前嘅partner都好好，但William有種對愛情的熱情，令人有初戀感覺嘅憧憬，係我想像唔到。」鄧達智年紀大過Clement十幾年，Clement謂完全沒問題：「冇，佢好後生，心智上，身體上，我白頭髮仲多過佢，咁呢點係同基因有關係啦。
【遇上白紋伊蚊】
為了影大草地及夕陽之光的專訪相，訪問臨時改在灣仔君悅對面花園進行，沒做防蚊措施，Clement和記者、攝記們一齊狂餵蚊，流住汗狂頴痕之際，只有Clement醫生本色出籠，「我見到有啲真係白紋伊蚊。」唔係啩！
更多精采時尚內容，盡在 http://add.appledaily.com 。