裕美14歲入行，至今15年，佢嘅演藝生涯同成績，絕對同「精采」呢個term扯唔上關係，但係佢啲緋聞，都幾曲折離奇。
唔計嗰啲唔出名嘅，裕美曾同現今已為人夫嘅陳柏宇拍拖，仲傳到兩人同居，女方係唔認戀情嘅，係陳柏宇舊年做電台訪問時，坦承曾經拍過拖，只係感覺冇咗就分手。到2011年，有傳裕美同前赤子成員張彥博拍拖，兩人仲分別喺微博貼過結婚相，當時裕美講到係會結婚，但係因為經理人及唱片公司合約問題，唔可以宣佈住，點知婚都未結，裕美就被發現同鼓手鄧應祈咀嘴偷食，有傳裕美求記者手下留情，最後同張彥博散咗，婚事撻Q，裕美男友變成鄧應祈；而裕美亦唔認同張彥博拍過拖。
去到2013年，裕美同鄧應祈分手，同年年底就高調宣佈嫁畀拍拖一年嘅林恩浩（Jason），Jason喺婚前一個月旺角行人專用區向裕美跪地求婚，兩公婆更喺婚後翌年，齊齊到澳洲working holiday，點知遇人不淑，被人呃，仲要倒貼開工，後來兩人「回流」返港。
去到舊年，好可能係裕美至今喺媒體曝光率最高嘅一年，佢被揭背夫Jason暗交無綫藝員黃子恆，揭吓揭吓，仲涉家暴同疑有情慾短訊，件事越搞越複雜，當時裕美聲稱搞緊離婚，但Jason拍片反擊踢爆，黃子恆後來亦拍片交代。結果，裕美同黃子恆都係分手收場。
而最近一次同裕美扯上關係嘅異性，係今年4月，有傳大台高層樂易玲幼子Ryan，同比佢大8年嘅裕美去談心，仲被人見到Ryan捉住裕美隻手嚟貼住自己隻手，當時裕美話當對方係細佬，咁大家就留名等睇下集啦…