由廖氏家族控股嘅廖創興企業（194），原主席兼執董廖烈武上月中喺養和醫院辭世，廖企噚日宣佈，由77歲嘅廖烈智接掌主席，佢係創興銀行（1111）創辦人廖寶珊第4仔，自1972年起已經係廖企執董，2014年開始，更擔任廖企董事總經理兼行政總裁。
公佈指，廖烈智現時每年可獲廖企支付薪酬同其他福利約882.2萬元；另外，作為公司主席兼CEO，佢亦可獲董事袍金25萬元。
祖籍廣東潮陽嘅廖氏，家族龐大人數眾多，剛仙遊嘅廖烈武，係廖寶珊第3子，而廖烈智與創銀同家族業務第二代掌門人廖烈文（前年底離世），為同一房兄弟。
2009年廖烈文退任創銀主席時，就由四弟廖烈智接掌該行董事總經理兼行政總裁，直到2012年底，廖烈智亦卸任CEO，並首次由外姓管理層劉惠民接棒舵手職務，被外界視為廖家為創銀放盤鋪路之舉，結果該行於翌年易手予中資越秀集團。
李華華