大台姐仔劉佩玥(Moon)，舊年憑《城寨英雄》做女三彈出，個勢開得好，但可惜之後無以為繼，反觀其緋聞是非一籮，除咗俾人影到約陳毓祥個仔、ViuTV主播陳安立睇戲，又同翟威廉食飯直落返屋企，「戰鬥力」超強。異性緣極旺嘅Moon，又俾人話喺直播唱歌時，藐爆港姐師妹麥明詩。
昨日有報道指，屬「進攻型」嘅Moon，原本接咗監製梁材遠嘅新劇《果欄中的江湖大嫂》做酒吧老闆娘，點知Moon臨開鏡前，突然起飛腳辭演《果》，原因係有另一個劇《跳躍生命線》搵佢做女二，諗過度過之後，心急上位嘅Moon，就決定劈炮唔撈，飛起梁材遠。
開鏡在即，梁材遠惟有搵同為港姐出身嘅馮盈盈頂上，更加重酒吧老闆娘嘅戲份，仲會安排楊明同佢發展感情線。雖然係執二攤，不過睇牌面，馮盈盈未嘗唔係執到支好籤。