利物浦中場菲臘比古天奴轉會巴塞隆拿嘅風波仲未止息，英國更有傳媒講古天奴特登喺練習中表現懶散，希望促成自己成功轉會。古仔深受巴塞注意，甚至有西班牙傳媒指巴塞將成功以1.3億歐元（約12億港元）完成收購，不過呢位巴西國腳周二喺美爾活訓練場如常操練，不過因為背部有傷而走咗去治療，但《天空體育》指古天奴操練時嘅態度專業，一如以往係世界級，未有異樣。而一月先同紅軍續約五年嘅古仔，表明唔會強逼球會放人，除非紅軍俾巴塞嘅出價打動，而紅軍領隊高路普一直話古天奴係非賣品。現職講波佬嘅紅軍名宿加歷查，都相信紅軍有力多留古天奴一季，出年夏天相信巴塞先至有機會收購古仔喎。