【星二代放暑假】前組合2R成員黃婉君（Rosanne）在09年下嫁混血牙醫Derek，之後生咗兩個囝囝，分別係6歲嘅白迅（Dylan）同4歲嘅白晨（Daniel），今個暑假Dylan同Daniel都會參加好多興趣班，包括足球、籃球、游水、網球、田徑、畫畫、唱歌同論語班，而較特別嘅一個暑期班，係右腦發展班。
Rosanne話：「囝囝零歲嗰陣，我就喺屋企開始閃卡，一秒一張呢個動作，眼focus咗可以幫到佢哋右腦，如果慢閃就係train到左腦。」Rosanne仲專登上堂學習點閃卡，由零歲開始由黑白卡到彩色卡，每日同一組卡閃三至五次，真係好花時間同心機，但覺得好值得。
「唔係要做天才」
雖然囝囝人仔細細，但Rosanne話佢哋已經識得講普通話、英文、廣東話，亦聽得明簡單嘅法文、西班牙文同印尼話。問佢覺唔覺得自己係怪獸家長？Rosanne好坦白咁話﹕「一半一半啦，好多人話咁細個唔需要學咁多嘢，但我理念係想開發咗佢哋先，大個畀佢哋選擇，唔係要佢哋做天才。」
Rosanne囝囝上堂嘅學校係來自日本嘅兒童右腦及全腦開發學校，每堂收費約400元，老師Yorkie解釋：「右腦係image brain，一個圖像嘅腦袋，所有知識畀小朋友都係一個圖像，喺小朋友世界，一幅圖畫其實冇難度，所以我哋所有知識，包括中英數、常識、歷史、科學等都可以畀小朋友去認識。」
場地提供﹕Heguru
想隨時獲得更多親子資訊，快啲like Easy PaMa Facebook啦！
https://goo.gl/1qWM8g