政府透過司法覆核取消4名民主派議員資格，近13萬嘅選民意願被政府一筆勾銷，由於4人仲要畀埋政府嘅昂貴律師費，「守護公義基金」將於本周五至日喺全港各區籌款，幫補一下被政府強權打壓嘅4人。10幾個民主派團體同民間團體不分你我，攜手合作喺街站籌款，守護公義基金受託人陳日君樞機仲會喺周五現身中環，為籌款揭幕。
同以往不同，今次捐款者可獲贈磁石貼一塊，寫上「傘下一家」4個字，由一位書法老師執筆，等捐款者可以將守護公義嘅信念帶番屋企。
守護公義基金志工何秀蘭同八方講，磁石貼共有5,000塊，本來諗住委託一間內地廠房做，對方覺得冇七一、六四、港獨呢啲敏感詞，應該都冇問題，但何秀蘭話對話期間電話疑遭竊聽，為免有任何差池，最終都係喺香港廠房製造。