高鐵一地兩檢問題多多，建制派齊心協力護航，呢個話冇違反基本法，嗰個又話要對國家有信心，最好笑係港鐵主席鬼拍尾枕，話高鐵一個月營運要8,000萬，遲咗開通會倒錢落海云云。同香港人講法律、講法治精神，或者冇乜興趣，講錢就反而最實際，有高登仔計過條數，以𠵱家和諧號深圳去廣州80蚊人仔，打你高鐵上廣州收多一倍200蚊一張飛，唔計起高鐵成本，一個月要有26萬人次，即係一日要1.3萬幾人次先勉強達到營運成本，真係大膽講句，呢隻大白象有排拖累香港，特別係香港庫房，關係大家銀包，係唔係更加着緊呢？
法律問題有排拗，定律又點呢？由摩連奴（圖）喺波圖成名起計，執教第二季拎聯賽冠軍，就好似係定律；連皇家馬德里咁難帶，第二季、11/12年都可以拎到聯賽冠軍，數一數，摩連奴今季第二季帶曼聯，真係好大機會咁喎。戰友咖喱覺得曼城機會高啲，小弟就唔係咁睇，曼城成條後防換過晒咁滯，基爾獲加、班捷文文迪等係就係身價高，但都係攻強守弱，連舊將史東斯、奧達文迪都係成日派膠。
要拎聯賽冠軍，個人認為防守比進攻重要；車路士上季就演繹超強防守，摩佬都不甘示弱，簽尼曼查馬迪同域陀連迪路夫返嚟，防線更完整。其實曼聯今季最重要收購，唔係盧卡古，而係放走朗尼，講真朗尼身為隊長，但係水準急跌，出又唔係，唔出又唔得，嚴重影響球隊流暢度。今季決心畀桑馬達、MK仔用波，威脅力亦強，盧卡古打法啱晒摩佬嘅反擊戰術，曼聯三線都咁齊人，冠軍仲唔係佢？
文：牽牛