上次講到300萬港紙可以買到超過1,300呎的溫哥華樓，仲有700萬港紙all in收息股退休，不少當地人唔同意，當然我講嘅並非獨立屋，而係好抵買嘅townhouse。
雖然有好多海外華人睇《蘋果》，不過因為係香港版寫，當然要解釋俾香港人聽，Townhouse係指右牆或左牆（甚至左右牆）都同隔離屋黐住，一棟棟相連嘅排屋，長居海外嘅人可能覺得樓、人太多，私隱度又低etc，不過對比香港，一層超過10戶人住，每間屋至少住返3、5、6個人，一棟樓已經近2,000人，人多？Come on James，Townhouse可以話係港人嘅dream house！
Townhouse面積通常超過1,000呎，1,500呎都有，有三、四層樓，有basement，雖然每層樓面積唔大，不過是但一層都大過香港人住嘅蟑螂屋！「衣、食、住、行」，海外華人追求嘅未必呢啲野，可惜，唔少香港人連最基本嘅「住」都未解決，Townhouse對香港人已經算得上天堂，隔住個mon流吓口水，都不為過啫？
身為加拿大人，如果你有錢，有好高生活要求，要住人少小區、獨立屋，又唔想行幾層樓梯上樓上（有老人家更加明白），確實未必鍾意Townhouse。
但係Townhouse三房、三間廁所係正常配套，甚至送埋兩個車位，只係賣緊300萬港紙（我上網check過，揸車去Richmond定市區，20分鐘搞掂），對好多香港人嚟講，每呎，係每呎，只係賣緊2,300蚊港紙，簡直係執到寶。連加拿大部份後生仔女，都會覺得townhouse好住過apartment，每月供幾千蚊，如果買得起、供得到，邊會仲嫌棄？
PS：我記得睇過壹傳媒（282）年報，《蘋果》海外北美（美國、加拿大）讀者每月有成200萬人，歡迎北美讀者inbox交流。
Melody
上集傳送門:
http://bit.ly/2vJ58jo