菲律賓報紙「菲律賓星報」報導，中國將於九月派代表團到馬尼拉商討中國輸入菲傭的協議，成為上星期本港人士熱烈討論的新聞。「菲律賓星報」話中國聘請菲傭，月薪訂於一萬五千元港幣左右，薪水之高，冠絕亞太區，對菲傭十分有吸引力。
這條新聞，並非完全「新料」，本欄於今年4月10日講「上海菲傭」，已引述大公報報導，上海浦東分局發出批文，准許一名生物科技公司總裁聘用菲傭，一年合約，月薪約係6700港元。上海既已有菲傭個案，其他一線大城市如北京、廣州、深圳蠢蠢欲動，一啲都唔奇。中國東岸沿海富庶區域，有資格聘請菲傭嘅富豪及高級中產，數以千萬計，倘若「菲傭賓星報」報導屬實，中菲有關輸出／輸入菲傭一事達成協議嘅話，菲傭選擇去上海等大城市，唔嚟香港，十分平常。
不過香港菲傭僱主又唔駛驚噃，澳洲、加拿大等地方請菲傭，人工夠晒高，但不見得有大量菲傭去澳加兩地，中國政府牢牢由共產黨控制，中共最驚有外國間諜滲入，外國家庭傭工就已是最好「木馬」，菲傭一日二十四小時住在企業高官或高幹家中，乜家事都睇得清楚，如為帝國主義敵人所用，咪弊傢伙？香港目前未有內地大陸人做家傭，即使特區政府批准輸入，香港家庭未必請得起，但即使合法與有錢，香港家庭是否願意聘請內地人做家傭呢？諗清楚家庭秘密的話，答案大可能是負面的。同樣道理，中資對菲傭、印傭之入境，更加有懷疑與敵意，所以中菲雙方是可以談判菲傭，開了大門，但小門恐怕未開得住，好多細節，要等中央諗掂先。
至於話菲傭識講英文，有助家中小孩學英語，此又未必。本欄（2015年10月20日）講菲律賓教育，指菲律賓學制係6年小學4年中學4年大學制，與國際慣例不同，即學童16歲入大學，比我地讀少兩年中學，2011年先至開始改為6年中學制，但遭學校及家長反對。換言之，出得嚟做菲傭，即使讀完大學，其實只係讀過4年中學，英文程度良莠不齊，菲律賓有不少大學難與國際大學相比，出自De La Salle，Santo Tomas就唔同，搵菲傭教英文，其實係碰運，不可過信。有此種種原因，中國大陸即使准許輸入菲傭，對香港不會有太大影響，反而會令政府頭痛，雙方政府如何管理菲傭活動，不致釀成歧視事件，會好困擾北京嘅，冇菲傭，對中國係小事，有菲傭，反會催生外交事故。