伍詠薇（伍姑娘）不嬲大情大性，喺圈中好友眾多，好似草蜢嘅蔡一傑、契妹陳敏之咁，喺圈中可以同伍始娘攬頭攬頸、嘟嘴影相嘅，仲有陳山聰。
點解要提陳山聰？因為佢哋兩個喺今年6月，於日本東京「世紀一吻」，錫一錫，冰封6年嘅姊弟情返番嚟。
曾經何時，伍姑娘同陳山聰係糖黐豆嘅契姊弟，但係自從陳山聰喺11年成功追到賭王何鴻燊三房超金何超雲之後，有指男方態度突變，喺同年10月，伍姑娘向當年35歲生日嘅契細佬陳山聰道賀時，男方忽然變臉，仲話：「你以後唔好再搵我！」一嘢就辣㷫咗伍姑娘！
伍姑娘其後喺微博宣佈要跟「一個人」割席，外界估計此人為陳山聰。如是者兩人斷交。直至前年胡杏兒結婚，伍姑娘同陳山聰喺婚宴上重逢，不過兩人亦未「破冰」，只係互有打招呼，但伍姑娘就話「有仇唔會記一世」。
真係撞啱天時地利人和，今年伍姑娘同陳山聰撞正同日喺香港出發去東京，仲喺機場遇到，於是就約埋喺東京見面，就喺呢餐飯，呢對契姊重新拖手，拍下「破冰照」貼喺社交網站，伍姑娘仲留言話：「今晚我終於拉番他上我的巴士，跟我一齊坐呢一程列車，一直到永遠……」
o氹番契家姐嘅陳山聰則留言：「等咗咁年，今日終於可以牽著妳的手，感恩。」之後山聰再貼兩人作狀咀嘴嘅合照，仲話：「一吻解千怨！盡在不言中！I love you！」
件事仲有下文，就伍姑娘、陳山聰約埋另一位「家人」陳敏之嚟食飯「團圓」，點都好過平日啲BBQ ending啦……