政府又有高層官員人事調動，通訊事務總監利敏貞（圖）下周五起升任商務及經濟發展局常任秘書長（通訊及創意產業），接替退休在即嘅何淑兒，利敏貞原職則由運房局副秘書長（房屋）王天予頂上。另外，懲教署署長邱子昭亦將退休，本月21日起將由副署長林國良接任。
利敏貞過去因同港視主席王維基就流動電視牌照隔空開火，曾經話「寧願被批評為僵化、官僚，也好過負起有法不依、執法不公的極大罪行」，寸魔童當咗自己係通訊局，當時被指戰鬥力勁過問責官員，喺好打得嘅林鄭管治下，相信大派用場。
利敏貞1988年加入政府，曾任行政署副署長、食衞局副秘書長、勞福局副秘書長等。公務員事務局局長羅智光話今次調任嘅都係資深政務官，有出色領導同管理才能，能夠喺新崗位提供專業高效服務。